Përleshje në shesh, arrestohen dy të mitur

Një situatë e tensionuar u regjistrua sonte rreth orës 21:00 në sheshin kryesor të Mitrovicës, ku dy të rinj të moshës së mitur u përfshinë në një përleshje fizike.

Pamje të siguruara nga Mitropol tregojnë momentet kur njësitet policore ndërhynë duke ndaluar njërin prej të dyshuarve dhe më pas duke e shoqëruar në stacion policor.

Zëdhënësi i Policisë për rajonin e Mitrovicës së Jugut, Avni Zahiti, ka konfirmuar për Mitropol se dy të dyshuarit janë marrë në pyetje nga hetuesit policorë dhe më pas janë liruar në procedurë të rregullt.

“Rreth orës 21:00, policia në Mitrovicën e Jugut ka shoqëruar në stacion dy persona të mitur, të cilët dyshohet se kanë qenë të përfshirë në një përleshje fizike të ndodhur në shëtitoren e qytetit. Pas intervistimit, të dyshuarit janë liruar në procedurë të rregullt. Rasti është iniciuar si ‘Lëndim trupor’”, deklaroi Zahiti për Mitropol.

Ngjarja ka shkaktuar vëmendje të madhe të qytetarëve, pasi përleshja ndodhi në një nga zonat më të frekuentuara të qytetit gjatë mbrëmjeve. Në vendngjarje u pa patrulla policore që u kujdes për menaxhimin e situatës dhe rikthimin e rendit publik./Mitropol/