Rozalinda kalon me sukses operacionin, nëna e saj falenderon shqiptarët

Në shkurt të këtij viti, JOQ Albania solli historinë e trishtë, por edhe të fortë të Rozalindës, 22-vjeçares që u përball me sëmundjen e rrallë ‘Neurofibromatozë’ me 18 tumore, mes tyre dy në kokë.

Brenda 24 orësh, shqiptarët mblodhën shumën e nevojshme për ndërhyrjen, por operacioni i parë shkaktoi paralizë, duke e lënë të palëvizshme përveç syve dhe pak buzëve.

Në gusht, nëna e saj iu drejtua sërish shqiptarëve për ndihmë, dhe solidariteti nuk mungoi. Sot, Rozalinda ka dalë me sukses nga një operacion vendimtar, dhe hapi i radhës është fizioterapia.

Mesazhi i plotë i mamasë së Rozalindës:

Faleminderim nga zemra

Në këtë rrugëtim kaq të vështirë për vajzën tonë Rozalindën, fjala “faleminderit” duket e vogël përpara gjithë asaj dashurie, mbështetjeje dhe solidariteti që kemi marrë. Sot, me shumë emocion, ndajmë me ju lajmin se Rozalinda ka dalë me sukses nga një operacion vendimtar në Gjermani, ku u godit një nga tumoret. Hapi tjetër do të jetë qendra e fizioterapisë, por sot kemi arsye të buzëqeshim e të shpresojmë edhe më shumë.

Një falenderim të veçantë dhe të përzemërt u drejtohet të gjithëve: Samy Dubai, Profesorit, Ziguri, Xhena, Babale, Klevis Celaj, Adi Grembi, Renato Alimucaj, Fabio Lalaj dhe shumë e shumë të tjerëve që hap pas hapi kanë kontribuar, janë interesuar dhe nuk na kanë lënë vetëm asnjë moment.

Një mirënjohje e madhe shkon për gjithë Shqipërinë, për çdo zemër shqiptare që na qëndroi pranë, dhe për mediat kryesore që u bënë zëri i kauzës sonë. Një falënderim i posaçëm për JOQ Albania që dha shumë për Rozalindën.

Nga zemra jonë: Faleminderit shumë, Shqipëri! ❤️