Zhduket 13 vjeçarja, Policia nis hetimet

Një vajzë e mitur, 13 vjeçare, është raportuar si person i zhdukur mbrëmjen e së shtunës në Fushë Kosovë.

Rreth orës 22:30, një qytetar ka raportuar në Polici se mbesa e tij është larguar nga shtëpia dhe nuk është kthyer më. Familja ka shprehur shqetësim për mungesën e saj dhe ka kërkuar ndihmën e autoriteteve.

Sipas Policisë, rasti është regjistruar si “person i zhdukur” dhe ka nisur hetimi për zbardhjen e rrethanave të largimit dhe gjetjen e së miturës.

Policia u bën thirrje qytetarëve që nëse kanë ndonjë informacion që mund të ndihmojë në lokalizimin e vajzës, të kontaktojnë menjëherë organet kompetente.