Lëndohet një punëtor në vendin e punës, dërgohet me urgjencë në spital
Edhe pse punëtorët shpesh herë marrin lëndime trupore gjatë kohës që janë duke punuar, kompanitë vendore bëjnë shumë pak për përmirësimin e kushteve të punës. Si pasojë e kësaj janë të shpeshta rastet kur punëtorët kërkojnë ndihmë mjekësore në spital për shkak të lëndimeve të marra, raporton Gazeta Sinjali.
Një rast i tillë ka ndodhur në fshatin Studençan të Suharekës, ku një person ka pësuar lëndime trupore teksa po kryente punë ndërtimore në një shtëpi.
Burimet e Gazetës Sinjali brenda Emergjencës kanë bërë me dije se 50-vjeçari është dërguar atje për ndihmë mjekësore, pasi kishte marrë lëndime në kokë. Pas intervenimit të mjekëve, gjendja e tij shëndetësore është stabilizuar dhe viktima ndodhet jashtë rrezikut për jetë.
Me urdhër të prokurorit, rasti është iniciuar ‘Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës’.
