Florian Isaku, kampion bote me Austrinë në garat e tramvajit

Florian Isaku, i lindur në Kërçovë dhe me prejardhje nga fshati Zhubrinë i Maqedonisë së Veriut, ka shkruar histori duke fituar vendin e parë në Kampionatin Botëror të Tramvajit, i zhvilluar në kryeqytetin austriak, Vjenë, shkruan albinfo.at.

Në këtë garë prestigjioze, e cila u mbajt më 13 shtator 2025, morën pjesë ekipe nga gjashtë kontinente dhe 28 shtete të ndryshme. Austria, të cilën e përfaqësuan Elisabeth Urbanitsch dhe Florian Isaku. Ky i fundit arriti suksesin më të madh duke u shpallur kampion bote në mesin e 25 ekipeve pjesëmarrëse.

Kampionati përfshin tetë disiplina të veçanta që testojnë aftësitë e drejtuesve të tramvajeve, përfshirë “Ndalo & Shko”, “Ruajtja e Shpejtësisë”, “Frenimi në Shënjestër”, “Bowlingu i Tramvajit”, “Kthimi prapa”, “Distanca anësore”, “Ndalesa e saktë” dhe “Curlingu i Tramvajit”.

Ky triumf i Florian Isakut nuk është vetëm një arritje sportive për Austrinë, por edhe një moment krenarie për shqiptarët e diasporës. Me përkushtim dhe talent, ai dëshmoi se sukseset ndërkombëtare janë të arritshme edhe në fusha të pazakonshme, duke vendosur emrin e tij dhe të Kërçovës në skenën botërore./Albinfo.at