Tronditet Arsenali, ndërron jetë futbollisti

Bota e futbollit është tronditur nga një lajm i rëndë. Ish-sulmuesi i të rinjve të Arsenalit, Billy Vigar, ka ndërruar jetë në moshën vetëm 21-vjeçare.

Sipas raportimeve, Vigar pësoi një dëmtim fatal në tru pasi u përplas aksidentalisht me një mur gjatë një ndeshjeje të Chichester City, klub për të cilin ai aktivizohej, fundjavën e kaluar.

Pavarësisht ndërhyrjes së shpejtë mjekësore dhe përpjekjeve për ta shpëtuar, dëmtimi rezultoi i parikuperueshëm dhe i riu nuk arriti të mbijetojë.

Billy Vigar kishte kaluar disa vite te akademia e Arsenalit, ku ishte vlerësuar si një nga lojtarët me perspektivë. Lajmi i ndarjes së tij nga jeta ka prekur thellë familjen, shokët e skuadrës dhe komunitetin sportiv.

Chichester City dhe Arsenal pritet të mbajnë homazhe për talentin e ndjerë, ndërsa rrjetet sociale janë mbushur me mesazhe ngushëllimi dhe dhimbjeje.