Abdixhiku: Fushë Kosova, model zhvillimi dhe histori suksesi e LDK-së

Në një tubim elektoral në Fushë-Kosovë, kryetari i LDK-së, Lumir Abdixhiku, prezantoi kandidatin e kësaj partie për kryetar të komunës, Besnik Osmanin.

Ai vlerësoi Fushë-Kosovën si histori suksesi dhe model zhvillimi, duke theksuar se ky transformim është rezultat i udhëheqjes së gjatë të Burim Berishës.

“Sonte qëndrojmë në një qytet që është histori suksesi, në një qytet që është shembull për gjithë Kosovën. Një qytet që na qëndron si model i zhvillimit, prosperimit dhe përparimit. Fushë Kosova është sot një tregim i madh për atë që Lidhja Demokratike e Kosovës di të bëjë kur ka besimin e qytetarëve të vet. Nga një periferi e vogël e kryeqytetit, e shpërfillur dhe e harruar dikur, sot Fushë Kosova është shndërruar në qytetin më dinamik, më energjik dhe më të rritur të vendit. Ky është rrëfimi juaj. Ky është rrëfimi i LDK-së. Ky është rrëfimi i 25 viteve punë, vizion e përkushtim. Këtu, në këtë qytet, njerëzit e dinë më së miri çka do të thotë të kesh një udhëheqje të përgjegjshme, një udhëheqje të fjalës së mbajtur dhe të punës së bërë. Këtu, qytetarët e Fushë Kosovës janë dëshmitarë të drejtpërdrejtë të transformimit më të madh urban e shoqëror që ka ndodhur në Kosovë në dy dekadat e fundit. Dhe ky transformim mban një emër.
Mban emrin e një njeriu që u bë sinonim i këtij qyteti. Mban emrin e një lideri që qëndroi këtu, me ju, për 25 vite me radhë. Mban emrin e Burim Berishës”, tha ai.

Në këtë tubim, Abdixhiku u bëri thirrje qytetarëve të vazhdojnë besimin te LDK-ja për të çuar përpara punën e nisur në komunë.

“Nuk është e lehtë të flasësh për një njeri që për një çerek shekulli ishte kryetar, ishte prijës, ishte vizionar, ishte lider politik i një qyteti të tërë. Nuk është e lehtë, sepse është e rrallë në historinë tonë politike një udhëheqës që ka udhëhequr për kaq gjatë me kaq shumë besim qytetar. Dhe Burim Berisha është pikërisht ai: një rast i rrallë, një rekord kombëtar, një figurë që do të mbetet përherë e gdhendur në kujtesën e këtij qyteti.
Për 25 vite, Burim Berisha nuk ishte thjeshtë kryetar. Ai ishte arkitekti i Fushë Kosovës moderne. Ai ishte njeriu që e nxori qytetin nga hija e kryeqytetit dhe ia dha identitetin e vet. Ai ishte ai që ndërtoi rrugë, shkolla, lagje të reja. Ai ishte ai që solli investime, që krijoi kushte për banim, për zhvillim, për tregti, për jetë. Ai ishte ai që i dha kuptim fjalës “qytet” këtu ku jemi sot.
Burim Berisha, për një çerek shekulli, nuk e la asnjë ditë qytetin pa shërbim. Ai nuk e la asnjëherë qytetin të bjerë prapa. Ai e ngriti atë në nivelin e një prej komunave më të përparuara të Kosovës. Për këtë arsye, sot, para jush, para qytetarëve të këtij qyteti, unë dua të shpreh mirënjohjen më të madhe, respektin më të thellë dhe nderimin më solemn për kryetarin legjendar të Fushë Kosovës, Burim Berishën”, shtoi kryetari i LDK-së, Lumir Abdixhiku.