E rëndë: Ky është punëtori që vdiq tragjikisht

Një ngjarje tragjike ka ndodhur të premten pasdite në një fabrikë në Suharekë, ku një punëtor ka humbur jetën gjatë orarit të punës.

Rasti e ka konfirmuar për Gazeta Sinjali Zëdhënësi i Policisë për Rajonin e Prizrenit, Shaqir Bytyqi i cili tha se i ndjeri ishte lënduar aksidentalisht, ku dyshohet se është goditur nga një pjesë metalike e një vinçi.

Viktima është Milit Daka, rreth 50 vjeç, punëtor në fabrikën “NewBalkan” në këtë qytet.

“I lënduari është transportuar me autoambulancë të QKMF Suharekë në Emergjencën e Spitalit Rajonal të Prizrenit, ku mjeku kujdestar ka konfirmuar se ai ka mbërritur pa shenja jete”, tha Bytyqi për Sinjalin.

Familjarë, të afërm dhe bashkëpunëtorë e kanë përkujtuar me dhimbje të ndjerin, ndërsa rrjetet sociale janë mbushur me mesazhe ngushëllimi për humbjen e tij.