IKShPK: Uji i Badocit është i sigurt për pije

Instituti Kombëtar i Shëndetësisë Publike të Kosovës (IKShPK) ka njoftuar të shtunën se uji i pijshëm që vjen nga Liqeni i Badocit është i sigurt për konsum.

Sipas njoftimit të IKShPK-së, monitorimet e fundit kanë treguar një ulje të dukshme të vlerave të manganit.

“Analizat laboratorike të kryera gjatë tri ditëve të fundit në Laboratorin e parametrave bazik dhe Laboratorin analitik – ICPMS tregojnë se përqendrimi i manganit ka variuar nga 0.012 mg/l deri në 0.037 mg/l, vlera këto që janë brenda kritereve të përcaktuara me Udhëzimin Administrativ nr. 10/2021 për cilësinë e ujit të destinuar për konsum nga njeriu”, thuhet në njoftim.