Zyrtari publikon numrin e telefonit të gazetares së ATV-së, AGK reagon
Reagimi i AGK-së:
Zyrtari i AAK-së në Deçan publikon të dhëna personale të gazetares së ATV-së
Shefi i shtabit zgjedhor të Aleancës për Ardhëmërinë e Kosovës në Deçan, Hajdar Sutaj, ka shpërndarë në Facebook, një bisedë private me gazetaren e ATV-së, Albina Haliti rreth ftesës për debat për kryetarin e kësaj komune, Bashkim Ramosaj.
Në këtë mënyrë, ai ka shpërndarë numrin personal të gazetares Haliti, duke bërë që ajo të marrë shumë mesazhe, duke përfshirë ofendime dhe kërcënime.
AGK-ja e dënon fuqishëm këtë veprim të Sutajt, dhe kërkon hetim dhe masa nga Agjencia për Informim dhe Privatësi.
AGK-ja e fton kryetarin Ramosaj, dhe partinë politike AAK, të distancohet nga ky veprim që shërben si nxitje për fjalor denigrues dhe urrejtje ndaj gazetarëve.
AGK-ja e fton AAK-në dhe partitë e tjera politike në garë që të angazhohen për bashkëpunim profesional me gazetarët gjatë kohës së mbulimit të fushatës zgjedhore dhe organizimit të debatave me kandidatët për kryetarë.
