Kërcënohet zyrtari policor, ish-gruaja ia merr fëmijët dhe shkon në Serbi

Jo rrallëherë ka ndodhur që zyrtarët policorë të përfshihen në raste të ndryshme të dhunës në familje, herë si viktima, e herë si të dyshuar. Dhuna shpesh është përcjellë edhe me kanosje serioze e përleshje brutale, për çka rastet janë hetuar nga Policia, raporton Gazeta Sinjali.  

Burimet nga Prokuroria kanë bërë të ditur se një ngjarje e tillë ka ndodhur edhe në Lipjan dhe kësaj radhe viktimë është një zyrtar policor, i cili e ka denoncuar për kanosje ish-bashkëshorten e tij.

Siç mëson Sinjali, viktima (emër i njohur për redaksinë), ka raportuar se ish-gruaja e tij i ka marrë dy fëmijët e tyre, për të cilët ai është kujdesur dhe i ka dërguar në Serbi, ku edhe jeton. Për të mos mbaruar me kaq, zyrtari policor ka deklaruar se ish-gruaja edhe e ka kërcënuar përmes rrjeteve sociale.

Si rezultat i denoncimit, Prokuroria është vënë në dijeni për detajet e rastit dhe ka urdhëruar nisjen e hetimeve në drejtim të veprës penale “Dhunë në familje”, ndërkohë që janë ndërmarrë edhe veprimet e tjera hetimore.