Valbona Bytyqi gjen kuletën me mbi 1400 euro dhe e dorëzon në Polici

Një gjest i rrallë qytetar ka ndodhur ditë më parë në Pejë, ku një grua ka dorëzuar në Polici një kuletë të gjetur me një shumë të konsiderueshme parash.

Më 24 shtator 2025, qytetarja Vlabona Bytyqi është paraqitur në Stacionin Policor në Pejë, pasi kishte gjetur një kuletë në një qendër tregtare të qytetit.

Brenda saj ishin gjithsej:

• 557 euro,
• 320 dollarë amerikanë (rreth 274 euro),
• 600 franga zvicerane (rreth 642 euro).

Shuma e përgjithshme e mjeteve monetare arrinte vlerën mbi 1,470 euro.

Policia ka arritur ta identifikojë dhe ta kontaktojë pronarin e kuletës, i cili është ftuar në stacion dhe i janë kthyer paratë së bashku me dokumentet.

Në njoftimin zyrtar, Policia e Kosovës ka falënderuar qytetaren për ndershmërinë dhe nivelin e lartë të përgjegjësisë qytetare, duke e cilësuar rastin si shembull të denjë për t’u ndjekur nga të gjithë.