MASHTI hap pesë mundësi të bursave për studentët

Ministria e Arsimit ka hapur pesë skema bursash në platformën e-Kosova për studentët e universiteteve publike në Kosovë dhe të universiteteve jashtë vendit në vitin akademik 2025/2026.

Pesë bursat që do të ndajë Ministria janë:

1. Bursa për komunitetet Rom, Ashkali dhe Egjiptian në vlerë 1,000 euro për studentët që regjistrohen për herë të parë në vitin e parë (bachelor) në universitetet publike të Kosovës.
2. Bursa për studimet jashtë vendit (niveli bachelor) deri në 5,000 euro për studentët kosovarë që studiojnë në Top 100 universitetet botërore sipas “Times Higher Education” (Arsimi i Lartë sipas Times).
3. Bursa për studimet jashtë vendit (niveli master) deri në 7,000 euro për studentët që vijojnë studime master në Top 200 universitetet botërore sipas “Times Higher Education”.
4. Bursa në vlerë 1,000 euro në vit për gratë në programet e Shkencës, Teknologjisë, Inxhinierisë dhe Matematikës (STEM) në universitetet publike të Kosovës.
5. Bursa elitare për studentët në universitetet publike – Për studentët e nivelit bachelor dhe master me mesatare së paku 9 (ose 8 për komunitetet Rom, Ashkali dhe Egjiptian), si dhe mbështetje për studentët me aftësi të kufizuara.

“Aplikimi bëhet vetëm përmes platformës e-Kosova. Konkursi për të gjitha skemat është i hapur nga 3 tetor deri më 18 tetor 2025, ora 16:00. Listat e përfituesve do të publikohen në faqen zyrtare të MAShTI.” – thuhet në njoftimin e MASHTI-t, më 03.10.2025.

Konkursin me dokumentet e nevojshme për aplikim për mbështetje financiare për studentët e komuniteteve Rom, Ashkali dhe Egjiptian mund ta gjeni në këtë LINK.

Në këtë konkurs, aplikuesit përveç që duhet të jenë studentë në vitin e parë dhe pjesëtar të komuniteteve të përmendura, kushtet tjera janë: gratë do të zgjidhen me preferencë për të rritur përfaqësimin e tyre në studime; përparësi kanë personat me aftësi të kufizuara.

Për aplikuesit që studiojnë jashtë vendit, në nivelin bachelor, në Top 100 universitetet botërore sipas Times Higher Education, konkursi dhe dokumentet e nevojshme janë në këtë LINK.

Sipas konkursit, këta studentë, duhet të mos kenë bursë/mbështetje financiare të plotë nga ndonjë skemë tjetër; përparësi kanë aplikuesit: që kanë gjendje më të dobët socio-ekonomike dhe ata me asistencë sociale, personat me aftësi të kufizuara, ata që kanë përfunduar nivelin paraprak të shkollimit në njërin nga institucionet arsimore të Kosovës.

“Studentët që përfitojnë nga kjo bursë duhet të bashkëpunojnë me Ministrinë për çështje të cilat ndërlidhen me studimet e tyre dhe të raportojnë për suksesin e tyre; 1. Studentët nënshkruajnë Deklaratë të Zotimit që marrin përsipër të promovojnë Kosovën, ndihmojnë në rrjetëzim të studentëve të tjerë dhe mentorojnë të tjerët nëse është nevoja.” – thuhet në konkurs.

Kurse, për kandidatët që studiojnë në nivelin master jashtë vendit në Top 200 universitetet botërore sipas “Times Higher Education” konkursin dhe dokumentet i gjejnë në këtë LINK. Kriteret janë të ngjajshme me ato që kërkohen nga studentët e nivelit bachelor që studiojnë jashtë vendit.

Konkursi për gratë që studiojnë fushat STEM – Shkencë, Teknologji, Inxhinieri dhe Matematikë, gjendet në këtë LINK.

Sipas konkursit, studentët duhet të kenë të përfunduar me sukses vitin paraprak (vitin e parë ose të dytë), me notë mesatare së paku 8; kurse të drejtë aplikimi nuk kanë studentet të cilat: e kanë përsëritur ndonjë vit, semestër të studimit; si dhe ato që janë studente në vitin e parë.

Konkursi për bursat elitare për studentët në universitetet publike të Kosovës në nivelin bachelor dhe master, si dhe mbështetja financiare për studentët me aftësi të kufizuara gjendet në këtë LINK.

Kandidatët që aplikojnë për këtë konkurs duhet ta kenë të përfunduar vitin e parë të nivelit bachelor; të mos kenë vit të përsëritur të studimeve; t’i kenë përfunduar të gjitha provimet e vitit akademik paraprak të përcaktuar me program studimor dhe në afat kohor të rregullt (afati i muajit shtator).

“Të kenë notë mesatare të studimeve së paku 9 (përjashtimisht pjesëtarët e komuniteteve rom, ashkali, dhe egjiptian ku nota mesatare duhet të jetë së paku 8 me qëllim të përmirësimit dhe rritjes së përfshirjes së tyre në arsimin e lartë)” – është kriteri tjetër që kërkohet në konkursin e bursave elitare.

Vitin e kaluar, KALLXO.com raportoi për ankesa të kandidatëve që aplikuan në bursat elitare.