Bekim Halilaj u rrëmbye, u vra dhe u var me kabllo në rrugë

Një 29-vjeçar shqiptar, i identifikuar si Bekim Halilaj, është gjetur javën e kaluar i varur me një kabllo pas një tabele sinjalizimi në unazën e Brukselit, në Anderlecht. Trupi i tij u zbulua më 28 shtator dhe prokuroria belge e ka cilësuar vdekjen si të dyshimtë, duke hapur hetime.

Sipas mediave belge dhe shqiptare, viktima dyshohet se ishte e përfshirë në një rrjet trafiku kokaine. Hetuesit nuk përjashtojnë mundësinë që ai të jetë rrëmbyer, ekzekutuar dhe lënë në atë vend si paralajmërim për grupe rivale, edhe pse pista e vetëvrasjes nuk është krejtësisht e mbyllur.

Bekim Halilaj me origjinë nga fshati Bicaj në Kukës, më herët kishte jetuar në Angli, ku ishte arrestuar në vitin 2017. Pas dëbimit nga Mbretëria e Bashkuar, ai ishte vendosur në Belgjikë ku kishte vazhduar sërish me aktivitetin e tij.

Mediat dyshojnë se ekzekutimi lidhet me humbjen e një ngarkese të madhe kokaine. Autoritetet belge po vazhdojnë hetimet për zbardhjen e plotë të ngjarjes.