Plagoset një person në Prishtinë, kjo është gjendja shëndetësore e tij

Një plagosje me armë zjarri ka tronditur pasditen e së dielës Prishtinën. Ngjarja ka ndodhur në rrugën “Garibaldi”, pranë Hotel “Grandi”, ku një person është qëlluar nga një tjetër që më pas është larguar nga vendi.

Sipas burimeve, incidenti ka ndodhur më 5 tetor 2025, rreth orës 16:45, kur policia ka pranuar informacion për një plagosje me armë zjarri. Njësitë policore kanë dalë menjëherë në vendngjarje, ku është gjetur një person me plagë në këmbë dhe dorë, raporton Podujeva Sot.

I plagosuri është dërguar në QKUK për trajtim mjekësor dhe është jashtë rrezikut për jetë. Autori i dyshuar është larguar në drejtim të panjohur dhe ndodhet ende në arrati.

Policia ka gjetur tri gëzhoja në vendin e ngjarjes dhe ka nisur hetimet për zbardhjen e plotë të rastit, raporton Podujeva Sot.

Prokuroria ka hapur rast për “Armëmbajtje pa leje”, “Përdorim të armës apo mjetit të rrezikshëm” dhe “Lëndim të lehtë trupor”. Hetimet po vazhdojnë për identifikimin dhe arrestimin e autorit të plagosjes në zemër të kryeqytetit.

Burimi: Sinjali