E mashtroi me shitjen e një bageri 25 mijë euro, arrestohet i dyshuari

Një rast i mashtrimit me vlerë të lartë financiare është zbardhur nga policia, pas hetimeve që çuan në arrestimin e një personi nga Klina, i cili dyshohet se ka mashtruar një qytetar nga Podujeva në një marrëveshje shitblerjeje për një bager.

Sipas informacioneve të para, më 04 tetor 2025, rreth orës 00:30, në Stacionin Policor të Podujevës është paraqitur një qytetar nga fshati Tërnavë, i cili ka raportuar se ishte mashtruar nga një person banues në Klinë.

Ankuesi ka deklaruar se më 03 tetor 2025 i kishte shitur të dyshuarit një bager të markës “Bobcat E-19”, prodhim i vitit 2023, ngjyrë e bardhë, me vlerë 25.500 euro, duke përpiluar një autorizim noterial për pronësinë e mjetit.

Por pas transaksionit, ai është ndjerë i mashtruar dhe ka revokuar autorizimin, duke kërkuar ndihmën e policisë.

Pas zhvillimit të hetimeve nga Njësia e Hetimeve të Përgjithshme në Prishtinë, konkretisht ekipi i Auto Krimeve, më 06 tetor 2025 është gjetur dhe arrestuar i dyshuari.

I njëjti është intervistuar në prani të avokatit mbrojtës dhe, me vendim të Prokurorit të Shtetit, është dërguar në ndalim policor për 48 orë.

Hetimet po vazhdojnë për zbardhjen e plotë të rastit dhe për sigurimin e provave lidhur me mashtrimin prej 25.500 eurosh.