Burri sulmon gruan dhe vjehrrën

Një rast dhune në familje është regjistruar mbrëmjen e së hënës në rrugën “Fehmi Agani” në Istog, ku një 23-vjeçar ka ushtruar dhunë fizike dhe psikike ndaj bashkëshortes dhe vjehrrës së tij, duke marrë pa leje foshnjën vetëm 2 muajshe.

Sipas raportit zyrtar, ngjarja ka ndodhur më 06 tetor 2025, rreth orës 22:30, kur viktimat janë paraqitur në polici për të raportuar rastin. Ato kanë deklaruar se bashkëshorti i njërës prej tyre kishte shkuar në banesën e nënës së saj, ku pas një mosmarrëveshjeje verbale, kishte marrë vajzën 2-muajshe pa pëlqimin e nënës.

Gjatë incidentit, kur nëna e viktimës kishte tentuar të njoftonte policinë, i dyshuari ia kishte marrë telefonin dhe e kishte shtyrë, më pas ishte larguar në banesën e tij.

Pas konsultimit me Prokurorin Kujdestar të Shtetit nga Departamenti i Përgjithshëm dhe për të Mitur, njësitet policore kanë ndërhyrë menjëherë në shtëpinë e të dyshuarit, ku kanë marrë foshnjën dhe ia kanë dorëzuar nënës së saj.

I dyshuari është arrestuar dhe intervistuar në Stacionin Policor të Istogut, ndërsa me urdhër të prokurorit, rasti është inicuar për veprën “Dhune në familje” dhe ai është liruar në procedurë të rregullt. Hetimet janë në vazhdim për të vlerësuar rrethanat dhe për të siguruar mbrojtjen e nënës dhe foshnjës.