LAJMI I FUNDIT: Qeveria ndan nga 100 euro për studentët
Qeveria në detyrë e Kosovës do të miratojë sot ndarjen e 100 eurove për studentë me rastin e fillimit të vitit të ri akademik, tha kryeministri në detyrë Albin Kurti në nisjen e mbledhjes së qeverisë të martën.
Kurti tha se të gjithë studentët të cilët i plotësojnë kriteret do të përfitojnë nga 100 euro ndihmë.
“Sot do të miratojmë vendimin për ndarjen nga 100 euro për të gjithë studentët që i plotësojnë kriteret, ashtu që ata dhe familjet e tyre ta kenë më të lehtë përballimin e kostove që ndërlidhen me fillimin e vitit të ri akademik”, tha ai.
Por, mbështetja nuk mbaron me kaq, vazhdoi Kurti.
Ai tha se qeveria në detyrë do të miratojë sot përmbushjen e bursës së mobilitetit për studentët e nivelit bachelor.
“Kjo bursë do të jetë masë e përhershme dhe mbështetje e vazhdueshme për studentët në nevojë dhe shuma e mbështetjes do të varet nga distanca ndërmjet vendbanimit dhe vendit ku ju studioni. Pra, sa ma larg ta keni universitetin ku ju studioni, aq më e madhe do të jetë përkrahja për ju”, tha ai.
