Cakolli: Ndarja e 100 eurove për studentë është e kundërligjshme
Eugen Cakolli e ka cilësuar si të paligjshëm vendimin e Qeverisë në detyrë për ndarjen e 100 eurove për studentë të miratuar në një mbledhje të kabinetit qeveritar të martën.
Anëtari i organizatës Demokracia në Veprim (DnV) ka theksuar se vendimi nuk është paraparë me buxhetin vjetor apo planin e punës të qeverisë.
“Rrjedhimisht, vendimet bien ndesh me Ligjin për Qeverinë dhe kufizimet që ai parasheh për qeverinë në detyrë”, tha Cakolli në një postim në rrjetin social Facebook të martën.
Sipas Cakollit, qeveria në detyrë ka miratuar vendime që bartin kosto prej mbi 100 milionë eurove.
Cakolli tha se ky është një shembull i qartë i përdorimit të resurseve publike për qëllime elektorale.
“Një veprim i tillë cenon garën e barabartë zgjedhore, duke krijuar avantazh të padrejtë për kandidatët e subjektit politik që udhëheq qeverinë dhe ndikon në sjelljen e votuesve, sidomos tek grupet e ndjeshme si studentët”.
Qeveria në detyrë, të martën miratoi ndarjen e 100 eurove për studentë për përkrahjen e tyre në fillimin e vitit të ri akademik. /Paparaci.com
