Plagoset pulmologu Zekirija Shahini

Pulmologu nga Likova dhe njëherësh kandidati për kryetar të Këshillit Komunal, Zekirija Shahini, ka qenë sot cak i një atentati në Kumanovë.

Dy persona të maskuar kanë shtënë me armë zjarri në drejtim të veturës së tij, rreth orës 13:54 minuta.

Nga të shtënat, Shahini ka mbetur i plagosur dhe me ndihmën e parë është dërguar në Spitalin e Qytetit në Kumanovë.

Drejtori i spitalit të Kumanovës, Sasho Stoshevski, konfirmoi për agjencinë MIA se i plagosuri është jashtë rrezikut për jetë.

“Personi është pranuar me katër plagë të shkaktuara nga arma e zjarrit në parakrahun e majtë dhe gjurin e djathtë. I kemi kryer të gjitha ekzaminimet. Pacienti është jashtë rrezikut për jetë. Ai është transportuar në spitalin e Shkupit”, tha Stoshevski.

“Dy persona të panjohur kanë shtënë me armë në veturën e personit Zekirija Shahini nga fshati Sllupçan, i punësuar në Klinikën e Pulmologjisë. Me ndihmën e parë është dërguar në spital”, njoftuan nga SPB Kumanovë.

Motivet e atentatit mbeten ende të paqarta, ndërsa policia ka formuar disa pista hetimi për të identifikuar autorët. Prokuroria Publike ka bërë të ditur se indikacionet e para nuk flasin për motive politike, megjithëse po hetohen të gjitha rrethanat e rastit, shkruan AlsatM, transmeton Klankosova.tv.

“Dy prokurorë nga Zyra e Prokurorisë Themelore të Kumanovës janë në vendngjarje. Gjurmët dhe provat materiale po grumbullohen dhe do të ekzaminohen. Një person është ndaluar lidhur me të shtënat, ndërsa sulmuesi kryesor është ende në kërkim”, thuhet në njoftimin e Prokurorisë.

Shahini, përveç profesionit si mjek pulmolog në Shkup, është edhe ish-ushtar i Ushtrisë Çlirimtare Kombëtare gjatë vitit 2001.

Lidhur me ngjarjen, kanë reaguar subjektet politike në vend.

Nga Bashkimi Demokratik për Integrim (BDI) kanë dënuar ashpër sulmin, duke e quajtur atë “akt barbar dhune” dhe kanë kërkuar nga institucionet që të veprojnë me transparencë dhe vendosmëri.

“Fatmirësisht, jeta e tij është jashtë rrezikut dhe ai po merr kujdesin e nevojshëm mjekësor. Kërkojmë nga MPB dhe Prokuroria të identifikojnë dhe arrestojnë autorët sa më shpejt. U bëjmë thirrje qytetarëve për qetësi dhe maturi”, thuhet në reagimin e BDI-së, e cila ka njoftuar edhe pezullimin e aktiviteteve të ditës në shenjë solidariteti.

Edhe koalicioni VLEN ka dënuar sulmin, duke kërkuar vetëpërmbajtje dhe respektim të institucioneve kompetente.

“Dënojmë çdo akt dhune dhe bëjmë thirrje për qetësi dhe respektim të institucioneve që duhet ta zbardhin rastin”, thuhet në reagimin e tyre.