Arrestohet një grua pasi dyshohet se sulmoi punëtorin

Një incident i rëndë ka ndodhur sot në mëngjes në Prishtinë, ku një grua ka sulmuar fizikisht një punëtor ndërtimi dhe ka kërcënuar me jetë një familjar të saj në prani të policisë.

Ngjarja ka ndodhur më 7 tetor 2025, rreth orës 07:50, në rrugën “Ismet Krasniqi”, ku punëtori ishte duke kryer punime në ndërtimin e një shtëpie, kur është sulmuar nga një grua rreth 30-vjeçare.

Sipas informacioneve, e dyshuara i ka dëmtuar veglat e punës dhe e ka goditur fizikisht të dëmtuarin, duke i shkaktuar lëndime të lehta. Viktima ka marrë trajtim mjekësor pas incidentit.

Tensionet kanë vazhduar edhe më pas, kur gjatë intervistimit në prani të policisë, e dyshuara ka kërcënuar një familjar të saj me fjalët: “Do ta fus plumbin në ballë!”.

Pas konsultimit me prokurorin kujdestar, rasti është iniciuar për veprat penale “Sulm” dhe “Kanosje”, ndërsa e dyshuara është dërguar në Qendrën e Paraburgimit.