Përleshje mes nënkryetarit të komunës dhe përfaqësuesit të PDK-së

Një incident fizik ka ndodhur pasditen e sotme në hyrje të objektit të Komunës së Gjakovës, ku janë përfshirë nënkryetari i Komunës, Flamur Fetahaj, dhe përfaqësuesi i PDK-së në Komisionin Komunal Zgjedhor (KKZ), Berat Hadri.

Sipas informacioneve që ka siguruar Gazeta Sinjali, përleshja ka ndodhur rreth orës 15:40, në ambientet e jashtme të komunës, ku fillimisht është zhvilluar një debat verbal ndërmjet dy zyrtarëve, e më pas konflikti ka përfunduar në goditje fizike.

Burimet bëjnë të ditur se ngjarja ka ndodhur në prani të disa personave të tjerë që ndodheshin në ndërtesë në atë moment.

Policia e Kosovës është kontaktuar  për rastin, por ende nuk është lajmëruar për të konfirmuar rrethanat  e ngjarjes, ndërkohë që rasti është sinjalizuar nga dëshmitarë të pranishëm.

Ende nuk dihen shkaqet e plota që kanë çuar në përplasjen fizike mes Fetahajt dhe Hadrit, por Sinjali ka mësuar se incidenti ka krijuar tensione brenda objektit të Komunës së Gjakovës.