Ekskluzive: Ky është personi që rrahu brutalisht një grua për shkak të xhelozisë
Një rast i rëndë dhune është regjistruar në Prizren, ku një shtetase gjermane ka pësuar lëndime të rënda trupore pasi është sulmuar fizikisht nga një burrë kosovar.
Ngjarja ka ndodhur në orët e hershme të mëngjesit të 8 tetorit 2025, në rrugën “Rruste Kabashi” në Prizren, ku pas një mosmarrëveshjeje të çastit, dyshohet për sulm brutal me motiv xhelozie.
Sipas të dhënave që ka siguruar Sinjali, Petrit Kryeziu, 38 vjeçar, pas një konflikti verbal e ka goditur me shuplaka dhe grushte në kokë e fytyrë viktimën I. B, shtetase gjermane, duke i shkaktuar lëndime të rënda trupore. Pas ngjarjes, i dyshuari është larguar nga vendi i incidentit.
Viktimës i është dhënë ndihma e parë mjekësore në emergjencën e Spitalit Rajonal të Prizrenit, ndërsa më pas është transferuar në QKUK – Prishtinë për trajtim të mëtejshëm.
Pas lokalizimit dhe arrestimit të tij, Kryeziu është intervistuar në prani të avokatit mbrojtës, ku ka mohuar veprën penale që i ngarkohet.
