LAJMI I FUNDIT: Aksident i rëndë trafiku

Një aksident i rëndë komunikacioni ka ndodhur sot në Çagllavicë, në rrugën Ferizaj–Prishtinë, ku dy persona kanë mbetur të lënduar rëndë pas përplasjes së një veture me një motokultivator.

Ngjarja ka ndodhur më 11 tetor 2025, rreth orës 12:00, ku janë përfshirë: Një veturë Opel Zafira me ngjyrë të kaltër, që drejtohej nga M.Sh. rreth 24-vjeçar nga fshati Rufc i Vjetër, Lipjan; Një motokultivator pa targa, me ngjyrë portokalli, që drejtohej nga E.Ç. rreth 21-vjeçar nga fshati Preoc, me pasagjer R.Ç. rreth 53-vjeçar.

Si pasojë e përplasjes, të dy personat në motokultivator kanë pësuar lëndime të rënda trupore, ndërsa pasagjeri R.Ç. është në gjendje të rëndë dhe rrezik për jetë, duke vazhduar trajtimin mjekësor në QKUK – Emergjencë, ndërsa shoferi i tij ndodhet në gjendje më të stabilizuar.

Në vendin e ngjarjes kanë dalë njësitë policore dhe ekipet emergjente, ndërsa me urdhër të Prokurorit të Shtetit, shoferi i veturës është ndaluar në mbajtje.

Hetimet për rrethanat dhe shkaqet e aksidentit janë në vazhdim.