PDK: Tre persona të arrestuar për fotografim të votës

Sekretarja e Partisë Demokratike të Kosovës (PDK), Vlora Çitaku, ka njoftuar në një konferencë për media se tre persona janë arrestuar në një qendër votimi në Drenas për fotografim të votës.

“U njoftova nga dega jonë në Drenas, se falë intervenimit të vëhguesve tanë në një qendër votimi për fotografim të votës. Kur të kemi detaje, do t’ju njoftojmë”, deklaroi ajo.

Megjithatë, Çitaku tha se, sipas të dhënave të deritanishme, procesi zgjedhor po zhvillohet kryesisht mirë.

Në fund, Çitaku u bëri thirrje qytetarëve që të marrin pjesë në votime, duke e theksuar rëndësinë e këtij procesi.

“Të votojnë me përgjegjësi, bindje dhe shpresë. Të votojnë për të ardhmen që e duan dhe që e meritojnë. Katër vjet janë një jetë”, theksoi ajo, duke shtuar:

“Ne besojmë në qytetarët e Kosovës”.