Dhunë dhe tentim ngulfatje në “villë”

Një rast i rëndë dhune në familje është raportuar në fshatin Katundi i Ri – Pejë, ku një grua ka përjetuar momente tmerri pasi është keqtrajtuar fizikisht dhe psikikisht nga partneri i saj pas një konflikti verbal.

Sipas burimeve, rasti është denoncuar më 12 tetor 2025 nga S.M., e cila ka deklaruar se është në lidhje me të dyshuarin J.M. që nga viti 2023.

Ajo ka treguar se atë pasdite kishte shkuar me vetë dëshirë në një “villë” në Katund të Ri, por aty situata kishte dalë jashtë kontrollit. Pas një zënke, i dyshuari e kishte ofenduar me fjalë të rënda, e kishte goditur disa herë, dhe në një moment e kishte kapur për fyti, duke tentuar ta ngulfatë.

Më 13 tetor 2025, Njësia e Hetimeve të Dhunës në Familje në Stacionin Policor Pejë ka kontaktuar Prokuroren Kujdestare, e cila ka urdhëruar inicimin e rastit “Dhunë në familje”.

Rasti është duke u hetuar, ndërsa autoritetet kanë paralajmëruar veprime të tjera për gjetjen dhe arrestimin e të dyshuarit.