I mituri godet me thikë shokun gjatë lojës së bilardos

Një ngjarje e rëndë është shënuar mbrëmjen e së hënës në Hajvali të Prishtinës, ku një konflikt mes dy të miturve ka përfunduar me plagosje me thikë.

Sipas informacioneve të Sinjalit, më 13 tetor 2025, rreth orës 23:00, njësitë policore janë njoftuar se në QKUK – Prishtinë ishte dërguar një i mitur me plagë në shpinë të shkaktuar nga një mjet i mprehtë. Viktima, E.P. po merrte trajtim mjekësor në momentin e mbërritjes së policisë.

Hetimet fillestare zbuluan se ngjarja kishte ndodhur në rrugën “Dëshmorët e Gollakut” në Hajvali, gjatë një loje bilardoje, ku pas një zënke të çastit, i dyshuari L.G. kishte goditur me thikë shokun e tij.

Me vendim të Prokurorit të Shtetit, rasti është inicuar si “Lëndim i rëndë trupor”, ndërsa i dyshuari është ndaluar për 24 orë dhe është dërguar në Qendrën e Ndalimit.