“Do ta nxij jetën” – arrestohet burri që kanosi gruan

Një rast i dhunës në familje është regjistruar mbrëmjen e së shtunës në fshatin Preoc të Graçanicës, ku një burrë është ndaluar nga Policia e Kosovës pasi dyshohet se ka kanosur bashkëshorten e tij, duke i shkaktuar frikë serioze për jetën.

Sipas informacioneve të Gazetës Sinjali, rasti ka ndodhur më 18 tetor 2025, rreth orës 22:00, kur viktima S.Th rreth 43-vjeçare është paraqitur në Stacionin Policor, ku ka treguar se prej dy ditësh kishte pasur mosmarrëveshje të vazhdueshme me bashkëshortin e saj, A.Th rreth 35-vjeçar.

Në deklaratën e saj, ajo ka bërë të ditur se konflikti verbal mes tyre është përshkallëzuar, ndërsa i dyshuari e ka kërcënuar duke i thënë se “do t’ia nxij jetën” dhe se “nuk do ta shohë më djalin e saj me sy”, fjalë që i kanë shkaktuar ndjenjë frike dhe pasigurie.

Hetimet po vazhdojnë nën mbikëqyrjen e Prokurorisë Themelore në Prishtinë për të sqaruar rrethanat e plota të rastit.