Arrestohet një person për ngacmim të 21 vjeçares në Prishtinë

Një rast ngacmimi është raportuar mbrëmjen e së dielës në rrugën “Enver Gjerqeku” në Prishtinë, ku një vajzë 21-vjeçare ka njoftuar policinë për ndjekje dhe shqetësim të vazhdueshëm nga një person i njëjtë,

Sipas burimeve nga Prokuroria, viktima ka deklaruar se është ngacmuar nga një mashkull rreth 29-vjeçar, i cili, sipas saj, e kishte shqetësuar edhe më herët, për çka ndaj tij ishin iniciuar dy raste të mëparshme.

Policia ka lokalizuar të dyshuarin dhe e ka ftuar në stacion për intervistim, ku ai ka pranuar se kishte shkuar në vendin e punës së viktimës dhe kishte filluar të diskutojë me të.

Pas intervistimit, me vendim të prokurorit kujdestar, i dyshuari është ndaluar për 48 orë, ndërsa ndaj tij është hapur rasti “Ngacmim”.

Hetimet janë në vazhdim për të verifikuar nëse kemi të bëjmë me përsëritje të veprës penale dhe shkelje të masave të mëparshme ligjore.