Nis rinumërimi i pesë vendvotimeve

Në Qendrën e Numërimit dhe Rezultateve (QNR), të hënën rreth mesnatës është përmbyllur procesi i numërimit të fletëvotimeve nga votimi jashtë Kosovës, ndërsa ka nisur puna për rinumërimin e pesë vendvotimeve, sipas urdhrit të Panelit Zgjedhor për Ankesa dhe Parashtresa (PZAP).

Këtë e ka bërë të ditur zëdhënësi i KQZ-së, Valmir Elezi, i cili tha se vendvotimet që do t’i nënshtrohen rinumërimit janë dy nga Mitrovica e Jugut, dy nga Kamenica dhe një nga Podujeva.

Elezi tutje bëri të ditur se gjatë ditës së sotme në QNR do të nisë numërimi i votave me kusht dhe atyre të personave me nevoja të veçanta për zgjedhjet e 12 tetorit.

“Në vazhdim të aktiviteteve të planifikuara, gjatë ditës së sotme në QNR do të fillohet me numërimin e fletëvotimeve që i takojnë votimit me kusht dhe atyre nga votimi i personave me nevoja të veçanta. Votimi me kusht është realizuar në 54 vendvotime speciale në 38 komuna, ndërsa votimi i personave me nevoja të veçanta është zhvilluar jashtë vendvotimeve, përmes ekipeve mobile gjatë ditës së zgjedhjeve”, tregoi ai për RTKlive.

Tutje, Elezi tha se fillimisht do të bëhet numërimi i fletëvotimeve me kusht nga komunat Deçan, Istog, Kaçanik, Fushë Kosovë, Kamenicë, Shtërpcë, Mamushë, Hani i Elezit, Ranillug dhe Mitrovicë e Veriut, ku tashmë është përmbyllur skanimi i listave të votuesve.

Elezi gjithashtu bëri të ditur se në QNR po zhvillohet procesi i skanimit të Listës së Votuesve, hap ky thelbësor për garantimin e integritetit të procesit zgjedhor.

“Pasi skanimi mundëson krahasimin e pjesëmarrësve në votim në vendvotimet e rregullta me ata që kanë votuar me kusht. Qëllimi është të identifikohen rastet eventuale kur një person ka votuar dy herë: në vendvotimin e rregullt dhe në atë me kusht”, sqaroi Elezi.