Përplasje e dhunshme në spital – tre persona sulmojnë dhe kërcënojnë policët në detyrë

Nuk janë të rralla rastet kur zyrtarët policorë ballafaqohen me kërcënime serioze nga qytetarë në qytete të ndryshme të Kosovës. Shpesh herë pakënaqësitë e tyre kalojnë në kërcënime, duke ua vështirësuar kështu punën e madje duke ua kërcënuar edhe jetën, raporton Gazeta Sinjali.

Një incident i tillë ka ndodhur mëngjesin e sotëm në Spitalin Rajonal të Pejës, ku tre persona kanë sulmuar dhe kanosur zyrtarë policorë gjatë kryerjes së detyrave zyrtare. Ngjarja ka ndodhur rreth orës 09:30 në rrugën “Nëna Terezë” dhe ka përfshirë një përplasje fizike dhe verbale brenda repartit të emergjencës.

Sipas burimeve të besueshme të Gazetës Sinjali, patrulla policore ishte thirrur në vendngjarje pasi dy persona, që po merrnin trajtim mjekësor, kishin hyrë në konflikt verbal. Në momentin që zyrtarët policorë kanë mbërritur për të qetësuar situatën, Valon Ukaj, rreth 30-vjeçar – njëri nga të dyshuarit – ka reaguar me agresivitet dhe fyerje ndaj tyre, duke thënë:

“A jeni ardhë me u ngatrru me neve? A e dini se kush jeni ju?”

Menjëherë pas kësaj, Ukaj ka sulmuar fizikisht njërin nga policët, duke e goditur me kokë në gjoks. Zyrtarët e kanë neutralizuar atë pas përdorimit të forcës proporcionale, por gjatë arrestimit i dyshuari ka rezistuar aktivisht, duke tentuar të pengojë policinë në kryerjen e detyrës.

Në vendngjarje kanë mbërritur edhe dy zyrtarë të tjerë, të cilët janë përballur me reagimin agresiv të Bajram Ukajt, rreth 62-vjeçar dhe Gjyke Ukajt, rreth 59-vjeçar. Të dy këta persona kanë kanosur policët me jetë, duke iu thënë:

“Mbajeni mend se ka me ju kushtu shtrenjtë, veç sa të dalim prej këtu se kemi me ju vra.”

Të dyshuarit Valon dhe Gjyke Ukaj janë arrestuar në vendngjarje, ndërsa Bajram Ukaj është lënë në trajtim spitalor për shkak të lëndimeve të mëparshme nga një aksident rrugor.

Njëri prej policëve të sulmuar është dërguar për tretman mjekësor për dhimbje në gjoks.

Lidhur me rastin është njoftuar Prokurori Kujdestar, i cili ka urdhëruar inicimin e procedurës penale për tri vepra penale: ‘Sulmi ndaj personit zyrtar’, ‘Kanosja’, dhe ‘Pengimi i personit zyrtar në kryerjen e detyrave zyrtare’.

Prokurori ka lëshuar aktvendim për ndalim policor prej 48 orësh ndaj Valon Ukajt, ndërsa dy personat e tjerë janë liruar në procedurë të rregullt.

Hetimet janë duke vazhduar për zbardhjen e plotë të rrethanave të ngjarjes dhe për përcaktimin e përgjegjësisë penale.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.