Sulmohet një zyrtar policor në kufirin me Serbinë

Një incident serioz është raportuar të martën pasdite në komunën e Zubin Potokut, në zonën kufitare “Voji Misliçe” afër Junakës, ku një zyrtar policor i Njësisë për Reagim të Shpejtë është sulmuar gjatë detyrës.

Sipas burimeve, ngjarja ka ndodhur më 21 tetor 2025, rreth orës 16:30, kur një ekip policor prej katër operatorësh ishte vendosur në një pikë vëzhgimi pranë kufirit me Serbinë. Gjatë këtij patrullimi, nga drejtimi i Serbisë është vërejtur një automjet që po afrohej, dhe policët i kanë dhënë shenjë për ndalim me qëllim identifikimi dhe verifikimi.

Drejtuesi i automjetit, në vend që të ndalonte, ka lëvizur mbrapa për t’u larguar, duke goditur me pasqyrën e majtë zyrtarin policor A.M. në krahun e majtë, të cilit i janë shkaktuar lëndime trupore.

Zyrtari i lënduar është dërguar menjëherë për trajtim mjekësor, ndërsa i dyshuari ka arritur të ikë në drejtim të Serbisë. Për shkak se patrulla ishte këmbësore, Policia nuk ka mundur ta ndjekë automjetin.

Prokurori i Shtetit është njoftuar dhe e ka kualifikuar rastin si “Sulm ndaj personit zyrtar”. Hetimet janë në vazhdim, ndërsa autoritetet po punojnë për identifikimin e drejtuesit të automjetit dhe të automjetit të përdorur në incident.