Grushta, sprej – sulm ndaj policëve, arrestohen dy persona

Një incident i rëndë është regjistruar pas mesnate në qytetin e Ferizajt, ku dy persona kanë përfunduar në pranga pasi dyshohet se kanë sulmuar fizikisht zyrtarët policorë gjatë kryerjes së detyrës zyrtare.

Sipas informacioneve të siguruara nga Sinjali, ngjarja ka ndodhur pas orës 00:30 në rrugën “Sadik Tafarshiku”, te një lokal nate, pas disa ankesave të përsëritura për muzikë me zë të lartë.

Burimet bëjnë të ditur se patrulla policore, pas arritjes në vendin e ngjarjes, kishte tentuar të gjobiste përgjegjësit e lokalit për prishje të rendit dhe qetësisë publike, por ata kishin refuzuar urdhrat ligjorë të policisë. Në ato momente, një turmë personash ishte grumbulluar rreth veturës zyrtare, duke penguar policët në kryerjen e detyrës.

Për shkak të situatës së tensionuar, zyrtarët policorë janë detyruar të përdorin sprej për shpërndarjen e turmës, pasi ishte rrezikuar siguria e tyre.

Gjatë ndërhyrjes, dy persona kanë sulmuar fizikisht policët, të cilët kanë pranuar tretman mjekësor për lëndime të lehta dhe irritime si pasojë e sprejit.

Të dy të dyshuarit janë arrestuar dhe ndaluar për 48 orë me urdhër të prokurorit kujdestar, ndërsa hetimet për zbardhjen e plotë të rastit janë në vazhdim.