29 vjeçari e sulmoi dhe e tërhoqi zvarrë nënën e tij

Një rast tjetër i dhunës në familje është regjistruar mbrëmjen e së shtunës në fshatin Vitomiricë të Pejës, ku një grua ka përjetuar tmerr nga djali i saj.

Sipas burimeve të besueshme, rreth orës 18:20, Policia e Kosovës është njoftuar për një incident familjar. Patrulla policore ka dalë menjëherë në vendngjarje, ku ka hasur viktimën H.B. dhe e ka arrestuar të dyshuarin R.M., i cili dyshohet se kishte ushtruar dhunë ndaj saj.

Nga deklarata e viktimës, mësohet se i biri ishte kthyer në shtëpi në gjendje të irrituar, kishte filluar t’i bërtiste dhe në ato momente kishte thyer telefonin e tij. E frikësuar, ajo kishte tentuar të largohej duke kërkuar ndihmë te fqinjët, por i dyshuari e kishte kapur për dore dhe e kishte tërhequr me forcë për ta kthyer në shtëpi. Viktima arriti të shpëtonte duke hyrë në shtëpinë e një dëshmitari, prej nga më pas njoftoi policinë.

Me urdhër të Prokurorit Kujdestar, i dyshuari është ndaluar për 48 orë, ndërsa rasti është iniciuar si “Dhunë në familje” dhe ndodhet nën hetim nga njësia përkatëse e policisë.

Viktima është intervistuar dhe më pas është kthyer në banesën e saj. Hetimet për rrethanat e plota të ngjarjes janë në vazhdim.