Lëndohet punëtori në vendin e punës, arrestohet pronari i kompanisë

Një rast i rëndë që lidhet me sigurinë në vendin e punës është regjistruar në Gjilan, ku një punëtor ka mbetur i lënduar gjatë orarit të punës.

Sipas burimeve të sigurta, pas hetimeve të zhvilluara dhe konsultimeve me Prokurorin e çështjes, është thirrur për intervistë pronari i kompanisë në lidhje me rrethanat e incidentit ku është lënduar punëtori.

Ai ka dhënë deklaratë me shkrim për mënyrën e kontraktimit dhe kushtet e punës, ndërsa pas vlerësimit të provave dhe deklarimeve, Prokurori i çështjes ka lëshuar vendim për ndalimin e tij policor.

I dyshuari është vendosur në Qendrën e Ndalimit Policor për 48 orë. Rasti do të procedohet me kallëzim penal për veprat “Asgjësimi, dëmtimi ose heqja e pajisjeve mbrojtëse” dhe “Rrezikim i sigurisë në vendin e punës”, ndërsa materiali hetimor do t’i dorëzohet Prokurorisë Themelore në Gjilan.

Hetimet për rastin janë ende në zhvillim.