Gjendet një burrë pa shenja jete, Policia nis hetimet

Një ngjarje e rëndë është regjistruar sot në mëngjes në fshatin Llapçevë të Malishevës, ku një burrë është gjetur pa shenja jete pranë një automjeti të ndalur në rrugë.

Rreth orës 07:00 të mëngjesit, një zyrtar policor që po kalonte me veturën e tij në dalje të fshatit në drejtim të Malishevës ka vërejtur një automjet të ndalur në skaj të rrugës dhe disa metra më tutje një person të shtrirë në tokë.

Polici është ndalur menjëherë për të parë gjendjen e personit dhe ka konstatuar se ai kishte nevojë urgjente për ndihmë mjekësore. Menjëherë është njoftuar Stacioni Policor i Malishevës, pas së cilës në vendngjarje kanë dalë patrulla policore dhe një ekip i QKMF-së së Malishevës.

Pavarësisht përpjekjeve të stafit mjekësor, personi ka ndërruar jetë në QKMF-Malishevë.

Me urdhër të Prokurorit të Shtetit, rasti është inicuar si “Hetim i vdekjes”, ndërsa në vendin e ngjarjes kanë dalë njësia e hetimeve të Malishevës, forenzika dhe hetimet rajonale.

Trupi i pajetë është dërguar në Institutin e Mjekësisë Ligjore për obduksion, me qëllim të përcaktimit të shkaqeve të vdekjes. Hetimet janë në zhvillim.