Punëtori humb jetën pasi bie nga skelet
Një ngjarje e rëndë ka ndodhur sot rreth orës 13:30 në lagjen “Bajram Curri” në Prizren, ku një punëtor ka humbur jetën pasi ka rënë nga skeletet e një ndërtese në ndërtim.
Sipas njoftimit të Policisë së Prizrenit, viktima është identifikuar si F.A., mashkull 34-vjeçar nga fshati Caravik i Malishevës.
Ai fillimisht është dërguar në Emergjencën e Spitalit Rajonal të Prizrenit në gjendje të rëndë, por më pas, rreth orës 16:30, është raportuar se ka ndërruar jetë në QKUK – Prishtinë.
Lidhur me rastin, N.B., pronar i kompanisë ndërtimore, është ndaluar për 48 orë me vendim të Prokurorit të Shtetit, nën dyshimin për veprën penale “Asgjësimi, dëmtimi apo heqja e pajisjeve dhe rrezikimi në vendin e punës”.
Policia e Kosovës njofton se, në bashkëpunim me Prokurorin e Shtetit, Inspektoratin e Punës dhe njësitë hetimore kompetente, po zhvillon të gjitha veprimet e nevojshme për të sqaruar plotësisht rrethanat e rastit.
