Dy të arrestuar nga ngjarja e rëndë që ndodhi sot në Podujevë

Një ngjarje e rëndë ka ndodhur pasditen e sotme në qytetin e Podujevës, ku një i mitur është therur me thikë në mes të rrugës.

Sipas burimeve nga hetimet, rasti ka ndodhur rreth orës 14:30, në rrugën “Zahir Pajaziti”, afër një lokali ushqimor, ku disa persona ishin përfshirë në një mosmarrëveshje që përfundoi me përdorim të armëve të ftohta.

Në momentin kur njësitë policore kanë arritur në vendngjarje, kanë hasur një të mitur të therur, rreth 17-vjeçar, i cili është transportuar menjëherë për trajtim mjekësor nga ekipi emergjent. Gjendja e tij është nën kujdesin e stafit shëndetësor.

Policia ka arrestuar dy persona të dyshuar që dyshohet se kanë qenë të përfshirë në incident dhe ka sekuestruar dy thika të përdorura gjatë ngjarjes si prova materiale.

Në vendngjarje kanë intervenuar njësitë e hetimeve dhe forenzikës, të cilat kanë kryer ekzaminimet për sigurimin e provave dhe zbardhjen e plotë të rastit.

Hetimet po zhvillohen nën drejtimin e Prokurorisë, me dyshimin për veprën penale “Vrasje në tentativë”.