Drejtori i mensës flet pas videos me miun

Pas raportimeve dhe ankesave të studentëve për praninë e një miu në hapësirat e mensës së Universitetit të Prishtinës, ka reaguar drejtori i këtij institucioni, Fahri Osmani.

Osmani tha për Gazetën Insajderi se ankesa është pranuar nga studentët dhe menjëherë janë ndërmarrë masa për eliminimin e brejtësit.

“Po, kemi pranuar nga ana e studentëve një ankesë rreth pranisë së një brejtësi në hapësirat e restorantit, dhe menjëherë i kemi marrë masat e duhura për eliminimin e tij. Për momentin nuk e dimë se cili ka qenë kanali i hyrjes së këtij brejtësi,” tha Osmani.

Ai ka shtuar se stafi i mensës, së bashku me kompaninë përgjegjëse për deratizimin, kanë bërë hulumtimin në të gjitha hapësirat dhe kanë ndërmarrë masa shtesë për deratizimin e plotë të objektit.

“Mensa për momentin është duke vazhduar punën në mënyrë të rregullt. Na vjen keq për studentët për këtë rast, por ju sigurojmë se ushqimi është i sigurt. Për këtë kemi njoftuar edhe Inspektoratin Sanitar, i cili vazhdimisht monitoron dhe kontrollon higjienën në hapësirat e mensës,” ka shtuar ai.

Sipas Osmanit, gjatë fundjavës është planifikuar që mensa të mbyllet për dy ditë për të kryer dezinfektim dhe deratizim të plotë të objektit./insajderi.org/