Gruaja vret dhe copëton pronarin e shtëpisë në Zvicër

Një ngjarje tronditëse ka ndodhur në Zvicër, ku një grua 39-vjeçare franceze dyshohet se ka vrarë dhe më pas copëtuar pronarin e saj 75-vjeçar. Mediat zvicerane raportojnë se viktima ishte shpallur i zhdukur më 31 tetor, ndërsa dy ditë më vonë banesa që ai ia kishte dhënë me qira gruas u përfshi nga flakët.

Pas hetimeve, policia gjeti pjesë të trupit të burrit në një zonë pranë Fédry, në Francë. Analizat mjeko-ligjore zbuluan plagë të shumta në trup dhe shenja që tregojnë për një përleshje të dhunshme.

Hetuesit besojnë se zjarri në banesë është vënë me qëllim për të fshehur provat e krimit. Në automjetin e të dyshuarës është gjetur një thikë, maja e së cilës përputhej me fragmentin e mbetur në trupin e viktimës.

Gruaja është arrestuar më 2 nëntor pranë kufirit mes Zvicrës dhe Francës dhe aktualisht po mbahet në paraburgim. Ajo po hetohet për vrasje, copëtim të trupit dhe zjarrvënie të qëllimshme.

Sipas mediave, viktima dhe e dyshuara kishin pasur mosmarrëveshje të vazhdueshme për qiranë dhe kushtet e banesës. Hetimet po vazhdojnë në bashkëpunim mes autoriteteve zvicerane dhe franceze për të sqaruar motivin e saktë të ngjarjes.