Abdixhiku – Kurtit: Studentëve po tenton t’ua blesh votën me 100 euro

Kreu i LDK-së, Lumir Abdixhiku, ka reaguar pasi u ekzekutuan nga 100 euro për studentët, nga Qeveria e Kosovës, 3 ditë para balotazhit në disa komuna, raporton Gazeta Blic.

Ai përmes një postimi në Facebook, ka thënë se Kurti po provon t’ua blejë me nga 100 euro votën, pasi ua vodhi të ardhmen.

“Një regjim i frikësuar dhe në rënie të lirë, po trajton studentët e Kosovës si material shitblerje zgjedhor. Studentët drejtojnë kohë, rrëzojnë regjime e përcaktojnë epokë”, ka shkruar ai.

Abdixhiku ka shtuar se s’mund të blihen studentët dhe të dielën do t’ua kthejnë përgjigjen me votë.

Postimi i tij i plotë:

Të ardhmen që ua vodhi, në shtetin më të varfër e më të izoluar në Evropë, me arsimin ndër më të fundit në botë, provon t’ua blejë me 100 euro për votë – tre ditë para balotazhit.

Një regjim i frikësuar dhe në rënie të lirë, po trajton studentët e Kosovës si material shitblerje zgjedhor. Studentët drejtojnë kohë, rrëzojnë regjime e përcaktojnë epokë.

Prandaj, këta SMS ‘cringe’, para zgjedhjeve nuk blejnë as heshtjen, as shpresën. As votën.

I keni nënçmuar.

Do t’iu kthejnë përgjigje këtë të diel me votë.

Kosova është shumë e mençur se sa po e trajton kryepopullisti sot!