Historia e Astrit Isufit me gruan e tij – xhelozi, rrahje e kërcënime

Dje në fshatin Golluboc të Malishevës ndodhi një rast tragjik ku Astrit Isufi vrau dy vëllezërit Driton dhe Naim Morina.

Astrit Isufi që nga dje ishte në arrati por u gjet sot në mëngjes në një shtëpi të pabanuar në fshatin Plloqicë, afro 4km nga vendi i ngjarjes.

Por cila ishte historia që e çoi deri në këtë akt?

Kallxo.com ka arritur të zbulojë disa detaje për një ngjarje që kishte ndodhur në mars të këtij viti, ku viktimë ishte gruaja e Isufit.

Ndaj Isufit ka pasur një aktakuzë në prill të viti 2025 për dhunë në familje dhe kanosje, andaj Gjykata Themelore në Prishtinë e kishte dënuar me burgim në kohëzgjatje prej 154 ditë dhe 800 euro gjobë.

Por vendimin e Themelores e kishte zbutur Gjykata e Apelit duke e ulur dënimin në vetëm tre muaj burgim duke aprovuar ankesën e palës së akuzuar.

Çfarë kishte ndodhur më 30 mars 2025?

Sipas dosjes së gjykatës, Astrit Isufi rreth orës 06:00 të mëngjesit përderisa gruaja e tij e kishte përgatitur drekën e festës së Brajramit, i pandehuri ishte zgjuar nga gjumi e kishte thirrë gruan e tij dhe e kishte goditur me peshqir në trup duke i kërkuar të njëjtës që t’i zgjojë fëmijët nga gjumi.

Gruaja kishte shkuar të fëmijët por ata nuk ishin zgjuar, e ajo ishte kthyer për t’i treguar Astrit Isufit ndërsa ai ishte nervozuar e më pas kishte nisur ta sulmoj gruan e tij me shuplakë e grushte në fytyrë e trup.

Disa orë më vonë, kur Astrit Isufi ishte kthyer në shtëpi pasi kishte shkuar të përshëndes familjarët për festën e Bajramit, kishte kërkuar ushqim nga gruaja e tij dhe kjo e fundit i kishte thënë se mungonte një produkt ushqimor e kjo më pas sërish kishte qenë një sherr i cili shkaktoi dhunën fizike të dytë brenda ditës nga Astrit Isufi te bashkëshortja e tij.

Dosja shpjegon se kur kishte marrë vesh Astriti se mungon një produkt, i kishte marrë pjatat e ushqimit dhe i kishte gjuajtur në tokë e më pas e kishte kap gruan e tij për dore e kishte tërhequr zvarrë e kishte futur brenda dhomës dhe kishte nisur ta qëlloj me një kabllo të rrymës në pjesë të ndryshme të trupit.

Në ato momente vajza e tyre kishte hyrë brenda dhomës dhe i kishte kërkuar babait të saj të ndaloj sepse ‘po e mbyste nënën’.

Ani pse kishte kërkesë nga vajza, dosja shpjegon se Astrit Isufi nuk kishte ndaluar deri sa i është dukur mjaftueshëm se e ka rrahur të dëmtuarën në këtë rast gruan e tij dhe më pas e kishte larguar nga shtëpia.

Në po të njëjtën ditë, Astrit Isufi sipas dosjes e kishte kërcënuar gruan e tij dhe e kishte paralajmëruar se nëse ndahet nga ai do t’ia vrasë gjithë familjen.

“Ti nuk guxon me u nda me mua, se ka me ta vra familjen, ka me t`i faru krejt”- përshkruhet kërcënimi që i kishte bërë Astrit Isufi, gruas së tij më 30 mars 2025.

Kjo situatë të njëjtës i kishte shkaktuar ankth, frikë dhe pasiguri për jetë.

Xhelozia shkak i dhunës në familje!

Pa telefon, duke përjetuar dhunë të vazhdueshme fizike, gruaja e Astrit Isufit në deklarimin e saj në seancën për caktimin e paraburgimit kishte thënë se burri i saj nuk i kishte lejuar telefon, nuk ka mundur më herët të raportoj dhunën në familje sepse nuk kishte mundësi, burri i saj ishte xheloz dhe i njëjti nuk ia kishte dashur as familjen e gruas së tij dhe i kishte thënë shumë herë që ‘nuk kanë çka lypin këtu’.

KALLXO.com zbuloi se gruaja kishte informuar organet e rendit muaj më parë se burri i saj kishte një armë të cilën e posedonte kohë më parë.

Ajo pas ngjarjes kishte qëndruar te familja e saj ndërsa fëmijët te babai për shkak që të mos ndërpritej shkollimi i tyre.