Qytetari gjen 1800 euro dhe dorëzon në Polici

Një gjest i rrallë ndershmërie është shënuar sot në Rahovec, ku qytetari Skender Krasniqi nga fshati Ratkoc ka dorëzuar në polici një shumë parash që i kishte gjetur gjatë lëvizjes së tij në qytet.

Sipas njoftimit zyrtar, Krasniqi derisa po kalonte në rrugën “Mulla Cufa” në Rahovec, ka gjetur një shumë të konsiderueshme prej 1,800 euro (nëntë kartëmonedha nga 200 euro secila) dhe i ka dorëzuar menjëherë në Stacionin Policor të Rahovecit.

Pas veprimeve të ndërmarra nga njësitet policore, është identifikuar pronari i shumës së humbur dhe paratë i janë kthyer atij.

Ky veprim i qytetarit Krasniqi është vlerësuar lartë nga Policia e Kosovës, e cila ka shprehur mirënjohje për ndershmërinë dhe përgjegjësinë qytetare të treguar.

Ky rast shërben si shembull frymëzues për gjithë shoqërinë, duke dëshmuar se ndershmëria dhe besimi në institucionet e rendit vazhdojnë të jenë vlera që e karakterizojnë qytetarin e përgjegjshëm të Kosovës.