Abdixhiku: Dritë do të ketë, ju zotohem

Lidhja Demokratike e Kosovës ka mbyllur fushatën zgjedhore për zgjedhjet e balotazhit.

Më poshtë postimi i Abdixhikut:

Faleminderit!

Tani që po përmbyllim një fushatë të jashtëzakonshme, këtë rrugëtim shprese, besimi e përkushtimi, dua të falënderoj nga thellësia e zemrës, secilin aktivist të LDK-së që për javë të tëra la familjen, miqtë e përditshmërinë për t’u bërë pjesë e një ëndrre të madhe. Ju që ecët me ne, derë më derë, lagje më lagje, qytet më qytet, duke përçuar me krenari vizionin tonë për një Kosovë më të mirë, ju jeni shtylla e rrugëtimeve tona.

Falënderim nga zemra për të gjithë kandidatët tanë në këtë garë; për guximin, për idetë, për dashurinë e sinqertë ndaj vendit. Ju jeni fytyra e vërtetë e LDK-së, shembulli më i mirë i politikës që shërben. Përparim, Gaz, Sokol, Xhafë, Arbër, Besnik, Ardian, Ruzhdi, Bexhet – dalshi faqebardhë nesër.

Dua të falënderoj me përulësi të gjithë qytetarët e Republikës, pa dallim bindjesh politike e partiake, që hapën dyert e shtëpive të tyre; që na dëgjuan, besuan dhe kështu na forcuan drejt rrugëtimit tonë. Në çdo fjalë, në çdo takim, në çdo shtrëngim duarsh, ndjemë dashurinë e njerëzve për vendin, për qytetin e tyre, për Republikën tonë.

Fushata mund të mbyllet sot, por rrugëtimi ynë vazhdon. Sepse ajo çfarë kemi mes vete nuk është vetëm çështje elektorale; është një mision, shumë më i madh se secili prej nesh. Është mision për një Kosovë të ndërtuar mbi punë, besë e shpresë. Mision se ky vend mund të jetë më i mirë, se politika mund të ketë shpirt, se e mira mund të fitojë me punë e ndershmëri.

Prandaj, ju faleminderit për gjithçka.

Krenar që ishim dhe mbesim pjesë e këtij rrugëtimi bashkë me ju. Kjo është LDK që kam ëndërruar gjithëherë; një familje e madhe e njerëzve të mbarë që besojnë në dritë, edhe kur rruga është e gjatë.

Dritë do të ketë!
Ju zotohem! ✌️