Dy vajza përfundojnë në spital nga rrahja

Një incident mes të rinjve është raportuar mbrëmjen e së premtes në Leposaviq, ku disa të mitur janë përfshirë në një rrahje fizike që ka përfunduar me lëndime trupore. Burime të besueshme nga Prokuroria e Shtetit konfirmojnë se rasti ka ndodhur më 07 nëntor 2025, rreth orës 22:50, në afërsi të lokalit “Mistik”.

Sipas të dhënave, pas ndërhyrjes së menjëhershme të policisë, janë identifikuar dhe ndaluar personat e përfshirë në incident: V. M, S.M. dhe T.D., të gjithë të dyshuar për veprën penale “Lëndim i lehtë trupor”.

Nga rrahja kanë mbetur të lënduara A.B. dhe T.R. të cilat janë dërguar në Shtëpinë e Shëndetit për të marrë tretman mjekësor.

Me urdhër të prokurorit kujdestar, rasti është iniciuar si “Lëndim i lehtë trupor”, ndërsa për shkak se të gjithë personat e përfshirë janë të mitur, ata janë liruar në procedurë të rregullt. Intervistimi i tyre do të zhvillohet në ditët në vijim, në prezencë të avokatëve mbrojtës dhe prindërve.

Hetimet janë në vazhdim për të sqaruar motivin e konfliktit dhe përgjegjësinë individuale të secilit nga të miturit e përfshirë në përleshje.