Sherr me armë dhe thika mes shqiptarëve në Itali

Tre shtetas shqiptarë janë plagosur me thikë pas një përleshjeje të dhunshme mes gjashtë personave, e cila dyshohet se ka ndodhur për “larje hesapesh”. Ngjarja ka ndodhur pasditem e djeshme, rreth orës 16:30, në një parking në Via Svevo, në kryqëzimin me Via Barbiero.

Sipas mediave lokale, gjatë sherrit janë dëgjuar edhe të shtëna me armë zjarri. Hetuesit kanë konfirmuar se në vendngjarje janë gjetur dy gëzhoja plumbash, çka tregon se arma është përdorur të paktën dy herë.

Në vendngjarje kanë mbërritur menjëherë patrullat e Karabinierëve, të cilët po hetojnë rrethanat e incidentit. Të plagosurit, të gjithë shqiptarë të moshës midis 30 dhe 35 vjeç, janë transportuar në spital dhe ndodhen jashtë rrezikut për jetën.

Autoritetet kanë sekuestruar pamjet filmike nga kamerat e sigurisë në zonë, përfshirë ato të dyqanit “Ognicasa”, për të rindërtuar dinamikën e përleshjes.

Ndërkohë, policia po kërkon tre shtetas të tjerë shqiptarë që janë larguar nga vendngjarja menjëherë pas incidentit. Dy prej tyre raportohet se kanë precedentë penalë për çështje droge.