Gjendet mjet shpërthyes në një depo banese, intervenon Policia e Kosovës

Një rast i pazakontë është regjistruar sot në Ferizaj, ku një mjet i dyshimtë shpërthyes është gjetur në një pronë private.

Sipas burimeve të sigurta, ngjarja ka ndodhur më 11 nëntor 2025 në rrugën “Avdyl Selam Ahmeti”, në shtëpinë e B.E. Ky i fundit ka njoftuar policinë se në pullazin e depos së tij ndodhej një mjet i dyshimtë i pashpërthyer.

Njësitet policore janë përgjigjur menjëherë, duke siguruar perimetrin e vendit të ngjarjes dhe njoftuar hetuesit e stacionit.

Pas vlerësimit të situatës, në vendngjarje kanë dalë ekspertët e njësisë për trajtimin e materialeve shpërthyese të Policisë së Kosovës, të cilët kanë tërhequr mjetin, që pas verifikimit dyshohet të ketë qenë një “shok-bombë” (mjet shpërthyes joletal).

Në lidhje me rastin është njoftuar Prokurorja Kujdestare dhe mjeti është asgjësuar në mënyrë të sigurt, ndërsa hetimet janë në vazhdim për të sqaruar origjinën dhe rrethanat e gjetjes së tij.