Rrahje e rëndë në një shkollë

Përleshjet mes nxënësve në shkollat fillore e të mesme në vendin tonë janë shumë të shpeshta. Plot incidente të tilla ndodhin brenda hapësirave të shkollave apo edhe në afërsi të tyre dhe eskalojnë edhe në rrahje brutale, siç ndodhi gjatë ditës së djeshme në, raporton Gazeta Sinjali.

Një i tillë është raportuar dje në oborrin e shkollës së mesme “Zenel Hajdini” në Gjilan, ku disa të rinj janë përfshirë në një përleshje që ka përfunduar me lëndime të rënda trupore.

Sipas burimeve të Sinjalit, ngjarja ka ndodhur dje, rreth orës 12:50, kur është raportuar për një rrahje mes disa nxënësve në kompleksin e shkollave të mesme të qytetit. Ekipet patrulluese kanë reaguar menjëherë, duke siguruar vendin e ngjarjes dhe mbledhur informacione fillestare.

Hetimet kanë konstatuar se i dyshuari L.B., rreth 14-vjeçar, nxënës i mitur, ka sulmuar me një mjet të mprehtë dy bashkëmoshatarë: R.L., rreth 17-vjeçar dhe I.H., rreth 16-vjeçar.

Si pasojë e sulmit, të miturit kanë pësuar lëndime të rënda trupore dhe janë dërguar me urgjencë në Qendrën Emergjente pranë Spitalit të Gjilanit, ku u është ofruar ndihma mjekësore.

Pas konsultimit me Prokurorin e Shtetit, rasti është kualifikuar si “Lëndim i rëndë trupor”, ndërsa ndaj të dyshuarit është shqiptuar masa e ndalimit prej 24 orësh dhe ai është dërguar në Qendrën e Ndalimit.

Hetimet vazhdojnë për ndriçimin e plotë të rrethanave dhe motivit të përleshjes.