Vendos Supremja, kjo komunë në rinumërim
Gjykata Supreme ka aprovuar ankesën e kandidatit për asamblist të Kuvendit Komunal në Komunën e Istogut nga radhët e AAK’së, Avni Gashi dhe ka parë si të domosdoshëm rinumërimin në disa vendvotime të raundit të parë të zgjedhjeve në këtë komunë.
“Gjykata Supreme vlerëson se në rastin konkret, PZAP ka vendosur refuzimin e ankesës së parashtruar nga kandidati për kuvend komunal, por nuk ka dhënë arsye të qëndrueshme dhe bindëse në raport me pretendimet ankimore”.
“Për pasojë, Gjykata Supreme vlerëson se rinumërimi i votave në vendvotimet e identifikuara në ankesë është i domosdoshëm për të vërtetuar rezultatin e saktë të zgjedhjeve dhe për të garantuar integritetin e procesit zgjedhor, në përputhje me parimin e besueshmërisë së zgjedhjeve të sanksionuar në nenin 45 të Kushtetutës së Republikës së Kosovës”, thuhet në njoftim.
Sipas parashtruesit të ankesës në rezultatet përfundimtare për kuvend komunale në Istog, kandidati nga radhët e subjektit politik AAK, me numër rendor 5, rezulton të ketë marrë 97 vota. Ndërsa sipas gjendjes faktike që është paraqitur në rezultatet e shpallura nga KQZ, si rezultate përfundimtare për kuvend komunal në Istog, rezulton që në disa qendra votimi dhe vendvotime, i njëjti ka më pak vota edhe pse votuesit e tij kanë deklaruar me shkrim që kanë votuar në këto vendvotime dhe se në bazë të deklaratave të tyre, numri i votave do të duhej të ishte më i madh.
“Në Qendrën e votimit Shkolla Fillore “Hysni Zajmi” në Vrellë: Vendvotimi 0606/03 sipas rezultateve të KQZ janë të publikuara gjithsej 21 vota, kurse i njëjti posedon 26 deklarata të votuesve të cilët pohojnë se kanë votuar numrin 5“, thuhet në vendimin e Supremes.
