Të shtëna me armë nga vetura në lëvizje

Një incident i rëndë me armë zjarri ka ndodhur më 21.11.2025 rreth orës 02:00 pranë restorantit “Kalaja” në Kllokot, ku nga një automjet në lëvizje janë shkrepur disa të shtëna, duke rrezikuar seriozisht sigurinë publike.

Sipas të dhënave që ka Sinjali, dëshmitarët kanë deklaruar se kanë dalë nga restoranti “Kalaja” dhe janë nisur drejt Vitisë me automjetin Ford, ngjyrë e bardhë, në pronësi të tyre. Gjatë lëvizjes, kanë parë të dyshuarin që ka nxjerrë armën dhe ka shtënë disa herë nga vetura.

Pas ngjarjes, dëshmitari e ka dërguar të dyshuarin në Viti dhe më pas është paraqitur në stacionin policor, ku ka deklaruar se e njeh personin që ka shtënë me armë zjarri.

Në vendin e ngjarjes kanë dalë njësitë e hetimeve rajonale, të cilat kanë sekuestruar 8 gëzhoja si prova materiale. I dyshuari nuk është hasur në vendngjarje.

Lidhur me rastin është njoftuar prokurorja e krimeve të rënda, e cila ka urdhëruar inicimin e rastit për veprën penale “Shkaktim i rrezikut të përgjithshëm” dhe “Gjuajtje me armë zjarri”.

Hetimet janë në vazhdim dhe autoritetet po punojnë për lokalizimin dhe arrestimin e të dyshuarit.